«Մայրի» -ն մշակութային կենտրոն է, որը նախատեսված է հատուկ կարիքներով երիտասարդների և երեխաների սոցիալական ինտեգրման համար:

Նախ և առաջ կենտրոնն ապահովում է ամենօրյա չորսժամյա աշխատանք արհեստանոցներում այն անձանց համար, ովքեր արդեն ավարտել են դպրոցը: Բացի այդ կազմակերպվում են զարգացնող պարապմունքներ հատուկ կարիքներով այն երեխաների համար, ովքեր չեն ներառվել հանրակրթական դպրոցի դասարաններում: Այս ամենն իրականացվում է բուժական մանկավարժների և հոգեբանների հսկողության ներքո:

Կենտրոնում գործում են հետևյալ արհեստանոցները՝ փայտամշակման, խեցեգործության, նկարչության, կարի, խոհանոցային աշխատանքի, մոմի պատրաստման: Հետագայում կգործի նաև գորգագործության արհեստանոցը: Բացի այդ, հարկ եղած դեպքում իրականացվում է նաև թերապևտիկ աշխատանք, ինչպես նաև երաժշտության (երգ/երաժշտական գործիքների ուսուցում), պարի, թատրոնի և այլ դասընթացներ:

«Մայրի» -ն փակ հաստատություն չէ, այն գտնվում է խիտ բնակեցված տեղում և բաց է շրջապատի բոլոր երեխաների համար: Մենք իրականացնում ենք մշակութային բաց նախագծեր և այստեղ իրենց ուժերը կարող են փորձել տարբեր մասնագետներ` խնդիրներ ունեցող և չունեցող անձանց հետ:

Այս ամենն իրականացնելով՝ մենք հույս ունենք, որ հետագայում մեր սահմաններն ավելի կընդլայնվեն: Մեր նպատակը ոչ թե հատուկ կարիքներով մարդկանց զբաղեցնելն է, այլև նրանց անհատական կարողությունները զարգացնելու համար հնարավորություններ ստեղծելը, ինչպես նաև ժամանակի ընթացքում վերջնականապես փոխել հասարակական կարծիքը խնդիրներով անձանց վերաբերյալ և կոչ անել` հարգել և ուշադրություն դարձնել վերջիններիս կարիքներին։